ПОТПИШАН МЕМОРАНДУМ ЗА СОРАБОТКА СО ФЕДЕРАЛНАТА АГЕНЦИЈА ЗА МЕТРОЛОГИЈА НА РУСКАТА ФЕДЕРАЦИЈА

23/05/2014 by admin

Денес, 23.05.2014 година, Директорот на Бирото за метрологија, м-р Димитар Парнарџиев и Федор Б. Владиленович, Заменик директор на Федералната Агенција за Техничко Законодавство и Метрологија (Rosstandart), во Москва, Руска Федерација свечено потпишаа Меморандум за разбирање и соработка во област на метрологијата. На потпишувањето на Меморандумот присуствуваа и претставници од Амбасадата на Република Македонија во Русија.

Главните области предвидени со Меморандумот за разбирање и соработка што денес беше потпишан, се унапредувањето на соработката во размена на знаења, учество во научно-истражувачки проекти, трансфер на знаење преку организација на обуки на вработените и учество на семинари, како и развој и воведување на нови методи и мерни техники во секојдневната работа.

Бирото за метрологија на Република Македонија и Федералната Агенција за Техничко Законодавство и Метрологија на Русија имаат водечка улога во област на метрологијата во рамки на своите држави и како такви имаат за цел обезбедување на униформност во мерењата како на национални, така и на меѓународно ниво, како и креирање на политики и хармонизација на легислативата од област на метрологијата.

Меморандумот претставува рамка, односно ја дефинира веќе иницираната соработка со Федералната Агенција за Техничко Законодавство и Метрологија со цел македонските метролози да имаат пристап до врвна обука, како и стручните лица од Русија да можат да го пренесат своето знаење и искуство, со можност за научна надградба што ги нуди оваа врвна институција.

Меморандумот посебно ќе се фокусира на унапредување, развој на потенцијалите и размена на искуства како во законската метрологија, така и во научно-истражувачката работа на Бирото за метрологија која е во својот зачеток.

Во рамки на потпишувањето на Меморандумот беше реализирана работна посета на Националниот метролошки институт на Русија (VNIIMS) оформен во рамки на Федералната Агенција за Техничко Законодавство и Метрологија. При работната посета на VNIIMS беше остварена средба со Директорот на институтот проф. д-р Сергеј Кононогов, заменик на директорот проф. д-р Лев Исајев, како и лицето одговорно за меѓународна соработка г-н Сергеј Комисаров. VNIIMS еврвна научно истражувачка институција во светски рамки, чија што главна дејност е истражување и креирање на политики за постигнување на униформност на мерењата на меѓународно ниво. Воедно, VNIIMS е институција која е што е одговорна за имплементација на законската регулатива во област на метрологијата.

Исто така, реализирана е и работна посета на Рускиот научен Институт за истражување на физичко-технички мерења (VNIIFTRI) чија што главна дејност е реализација на мерни еталони за повеќе области на мерење и дисеминација на мерните единици на национално ниво, како и остарување на следливост во мерењата на меѓународно ниво.

{gallery}stories/galerii/2014.05.23,limit=0,random=1,width=200,height=150,gap_h=15,gap_v=15,displayarticle=0,caption=0,image_info=0{/gallery}